لينا خالد / عمّان
لنتخيل !!
المشهد الأول / الساعة الـ 7 صباحاً ، طوابير الطلاب في مدارس القدس !
يعلو النشيد الوطني من أفواه الطلاب الصغيرة :
فدائي فدائي .. فدائي يا أرضي يا أرض الجدود ..
فدائي فدائي .. فدائي يا شعبي يا شعب الخلود ..
بعزمي و ناري و بركان ثاري و أشواق دمي لأرضي و داري صعدتُ الجبالَ و خضتُ النضالَ ، قهرتَ المحالَ حَطَمْتُ القيود ..
ينتهي الطابور ، يذهبون لصفوفهم ..
طفلان صغيران يجلسان في أخر درج في الصف يتحدثون ،
الأول : أيام ما كنا لاجئين ، كنت أسمع سيدي بغنيها ، و كان يقعدني جمبه و يقلي عيد من وراي يا سيدي هذا نشيدنا الوطني ، هذا النشيد لفلسطين ، بس نرجع - أو ترجعوا - رح تغنوها كثير يا سيدي ، أحفظها ..
أبوي طبعلي أياها على ورقة مشان اعلقها جمب تختي ، و كل يوم الصبح أوقف كأني واقف بطابور المدرسة و أغنيها !
الله يرحمه سيدي ، كان حابب كثير يشوف البلاد ( يصمت ) سيدي ضله هناك محدش عنده ، كلنا رجعنا بس هو لأ !
الثاني : وين كنتوا لاجئين ؟
الأول : كنا في عمّان ، أنتوا وين كنتوا ؟
الثاني : إحنا كنا في بيروت ، سيدي و ستي و عمامي الثلاث أستشهدوا في صبرا ، أبوي وقتها كان عند خالته في بيروت و ضل هناك ، ولما كبرت أول أشي علمني اياه هذا النشيد ، بتذكر كان في شريط بالسيارة وجه عليه "فدائي" و النشيد الثاني كان "أشهد يا عالم علينا و عبيروت" .. و نضل انعيدهم طول الطريق .
المشهد الثاني / باص القدس - حيفا ، الـ 7 صباحاً في يوم العطلة
صبيتان أحدهم تتلحف بكوفية سوداء وبيضاء ، تليق بسمارها و شعرها الليلي المجعد ، و الأخرى لها تسريحة الشهيدة " دلال المغربي" تلبس قلادة تحمل خارطة كبيرة لفلسطين ..
- بعد ما نمر على ستي في حيفا ، بدنا نكمل فوراً على الكرمل ، أشتقتله و ما صدقت أمتى نعطل مشان أروح هناك . ( تقول الصبية صاحبة تسريحة دلال ) .
- بس بدناش أنطول أمي وصتني أجيبلها برتقان من يافا ، بدنا نلحق السوق وهو فاتح !
- و إذا ما لحقناش بنلقط عن الشجر !
- يي أنجنيتي !!!
- يم ما صدقنا نرجع و ترجع هالأرض إلنا و بتقليلي أنجنيتي ! آه أنجنيت ، ولك هذا البرتقان إلنا و هذا شجرنا محدش بطلعلوا يقلي ليش بتلقطي من الشجر !
- مجنونة !
فيروز تغني :
يا دارة دوري فينا .. ضلي دوري فينا
تاينسو أساميهن و ننسى أسامينا
تعا تا نتخبى من درب الأعمار
و إذا هني كبروا نحنا بقينا صغار ..
- متذكرة ؟!
- أنا إلي متذكرة ..
تبتسمان .. تغنيان برفقة فيروز ، و ينظرون بالأفق حيث بحر حيفا يبدأ بالظهور ..
بديش أكمل .. بديش أياها تنتهي .. خلينا نضلنا نطلع بالأفق يمكن يظهر بحر حيفا قدامنا فجأة و يمكن نرجع و نغني فدائي !
